灶披间

年2月28日星期五

炒出迎春花的味道

灶披间

《炒出迎春花的味道》

买两根香乌笋来，

备一眼虾仁鸡蛋；

就迭能简简单单，

炒一碗迎春花开。

闷得牢，还是闷勿牢，有辰光，跟脾气性格有关。

前两天，有个人买了两斤饺子皮，要到朋友屋里去包饺子。结果，试了两趟，侪拨小区里保安拦牢。

大家懂的，现在辰光进进出出小区，侪要路条的。搿两个朋友属于闷勿牢的，要么就是电视剧看多了，搞七捻三，里厢的人开仔车子出来，捺外头人装勒后备箱里，想混进小区。哦哟，侬当仔人家保安侪喫素啊？

结果，后备箱打开，西洋镜拆穿。迭种辰光，做迭种小儿科事体，属于拎勿清的。

当然，有辰光也是因为客观条件。总要出去买点喫的、用的。特别是碰着勿习惯网购的，或者，网购呒么办法送到的。阿拉小区里是可以买着小菜的，不过，我一般性去一埭，也要买三四天的量。搿天，我本来已经买好了，就勒排队结账辰光，看到前头一个阿婆一记头买了元小菜，小推车装得扑扑满。心里一慌，顺手又朝篮头里加了两根香乌笋。

结果啊――

香乌笋切切丝，拿盐稍许擦一擦，捏脱点水；冰箱里有上趟用剩的半包虾仁，温水烊一烊；敲两只蛋，虾仁、盐、老酒一道打一打。开油镬，先炒虾仁蛋，虾仁有点变颜色了，蛋还呒么全部结牢，豪扫盛出来；再加点油，炒香乌笋，1、2分钟后，就捺虾仁蛋一道摆下去，翻炒到虾仁露出粉红堂堂的颜色，就可以盛出来了。哦哟，扑扑满一碗迎春花的感觉啊！

后来，我还试过单单香乌笋炒蛋。事实证明，呒么虾仁，迭碗迎春花就是一碗假花，味道推板交关。

沪语解释：

搞七捻三：胡闹。

小儿科：此地指做事幼稚。

推板：差

“点击阅读原文就能购买老师的画作哟”